संखुवासभा/ ‘नेपालकी छोरी म’ बोलको बाल गीतको म्युजिक भिडियो सार्वजनिक भएको छ । जिल्ला बाल क्लब समन्वय समितिले निर्माण गरेको ‘पाइला सफलताको’ बाल गीति एल्मबमा रहेको गीतको भिडियो सार्वजनिक भएकोे हो । बाल क्लब समन्वय समितिको गत कार्यकालको प्रमुख उपलब्धीको रुपमा देशभर चर्चामा रहेको एल्बम पाईला सफलताकोको पहिलो गीत सार्वजनिक भएको हो । सुरशाला इन्टरमेन्ट युट्युब च्यानल मार्फत सार्वजनि गरिएको गीत गत महिना छायाङ्कन गरिएको थियो ।
सदरमुकाम खाँदबारीको विभिन्न स्थानमा भएको छायाँङ्कनमा सुरशाला म्युजिक एण्ड डान्स एकेडेमीका बाल कलाकारहरुले नृत्य तथा अभिनय गरेका छन् । गीतमा एकेडेमीका प्रमुख तथा नृत्य निर्देशक कुमार अनुरागीले निर्देशन गरेका छन् भने पत्रकार दिपेन्द्र शाक्यले गीतको छायाँङ्कन गरेका हुन् । शाक्यले संखुवासभामा पहिलो पटक ड्रोन क्यामेरा मार्फत छायाँङ्कन गरेका हुन् । गीत अनुसार म्युजिक भिडियोमा पनि नेपालमा रहेको विभिन्न जातजातिहरुको भेषभुषा र संस्कृति झल्काइएको शाक्यले बताए । गीतमा १३ जना बाल कलाकारहरुले नृत्य तथा अभिनय गरेका छन् ।
देश र राष्ट्रियता बोकेको यस गीतमा बाल गायिका किञ्जन अधिकारीले स्वरबद्ध गरेकी छिन । दिपन कुमार श्रेष्ठको रचना, गोपाल सरगम राईको संगीत र संगीत संयोजन भविन ढुंगानाले गरेका छन् । लोप हुन लागेका जातिय भेषभुषा तथा संस्कृतिलाई गीत मार्फत उतारिएको रचनाकार श्रेष्ठले बताए । हेर्नुहोस् भिडियोः https://youtu.be/ISdi-yYYcaw
