पानवारी । धरान उपमहानगरपालिकाले अत्याधिक करवृद्धि गरेको भन्दै नेपाली कांग्रेसले उपमहानगरपालिकाको मुख्य गेट अघि २ घण्टा धर्ना दिएका छन् ।
धर्नामा धरानका २० वटै वडाबाट कांग्रेसका कार्यकर्ताहरुको सहभागीता रहेको थियो । धर्ना कार्यक्रम पश्चात नेपाली कांग्रेसले एकहप्तासम्म विभिन्न वडामा संकलन गरेको हस्ताक्षर धरान उपमहानगरपालिकाका कार्यवाहक नगरप्रमुख मणिराम राईलाई बुझाएको छ । बिहीबार नेपाली कांग्रेस धरानका सभापति तिलक राईले हस्ताक्षर बुझाउदै उपमहानगरपालिकाले वृद्धि गरेको करको दर नघटेसम्म आन्दोलन जारी रहने बताए । उनका अनुसार उपमहानगरपालिकाले अत्याधिक वृद्धि गरेको करेको विषयमा शुक्रबार पत्रकार सम्मेलन गरेर सम्पूर्ण जानकारी दिइनेछ ।
कांग्रेसका कार्यकर्ताले करवृद्धि फिर्ता गर, बहुमतको दम्भ देखाउन पाइदैन, जनता मार्न पाइदैन जस्ता नाराबाजी समेत गरेका थिए । नेपाली कांग्रेसले बुझाएको हस्ताक्षर बुझ्दै कार्यवाहक नगरप्रमुख मणिराम राईले कांग्रेसले उठाएको माग प्रति गम्भिर रहेको बताए । उनले यस विषयमा छलफल गरी माग सम्बोधन गरिने समेत बताए ।
