धरान / धरान–१५ स्थित ज्ञानोदय माविले सप्ताहव्यापी वार्षिक खेलकुद कार्यक्रम शुक्रबार सम्पन्न गरेको छ ।
स्कुलका ४ वटा सदनबीच गराइएको विभिन्न समूहगत र व्यक्तिगत खेलमा हरियो सदन च्याम्पियन बनेको छ । पहेँलो सदन दोस्रो बनेको स्कुलका सहायक प्रिन्सिपल खेमराज श्रेष्ठले जानकारी दिए । नर्सरीदेखि कक्षा १० सम्मका विद्यार्थीहरूबीच व्यक्तिगत ६४ र समूहगतमा १७ वटा खेलहरूबीच स्पर्धा गराइएको थियो ।
विजेता सदन तथा विद्यार्थीहरूलाई विद्यालय व्यवस्थापन समितिका अध्यक्ष लक्ष्मीकृष्ण श्रेष्ठ तथा सदस्यहरू बिनिता राई, डिबी श्रेष्ठ, लिजा घिमिरे तथा चन्द्रप्रसाद श्रेष्ठले पदक तथा प्रमाण पत्र वितरण गरे । विद्यार्थीहरूको अन्तरनिहीत प्रतिभा उजागर गर्ने उद्देश्यले सप्ताहव्यापी खेलकुद कार्यक्रम गरिएको प्रिन्सिपल टिबी क्षेत्रीले जानकारी दिए ।
यसक्रममा विद्यालयका शिक्षकशिक्षिकालाई मायाको चिनो पनि प्रदान गरिएको विद्यालय व्यवस्थापन समिति सदस्य एवम् कार्यक्रम संयोजक प्रेम तुलाधरले जानकारी दिए ।
