धरान/युरेका स्कुलले बुधबार वार्षिक नतिजा प्रकाशन गर्दै उत्कृष्ट विद्यार्थीहरूलाई पुरस्कृत गरेको छ ।
प्रथम, दोस्रो र तेस्रो हुने विद्यार्थीहरूलाई मेडल र प्रमाण पत्रले पुरस्कृत गरिएको हो । त्यस्तै खेलकुदमा उत्कृष्ट भएकाहरूलाई पनि मेडल, प्रमाण–पत्र र ट्रफी प्रदान गरिएको स्कुलका भाइस प्रिन्सिपल कुरन सुब्बाले जानकारी दिए । कार्यक्रममा पूर्व विद्यार्थी विराट मेडिकल कलेजका शिक्षक सुमन पोखरेललाई सम्मानित गरिएको छ । यसक्रममा युरेका स्कुल २५ वर्ष पुगेको अवसरमा शिक्षिका झरना श्रेष्ठलाई दोसल्ला ओढाई नगद ११ हजार रुपैयाँले सम्मानित गरिएको छ ।
कार्यक्रममा प्रमुख अतिथि ब्लाष्ट दैनिकका सम्पादक किशोरकुमार कार्की, युरेका स्कुलका प्रिन्सिपल राजेन्द्र गुरुङलगायतले सम्मान–पत्रले सम्मानित गरे । कार्यक्रममा यस वर्षको स्टुडेण्ट अफ दी इयर जुनियरमा विज्ञान राई घोषित हुँदा सिनियरमा शैलेस अग्रवाल घोषित भए । त्यसैगरी स्कुलले वेष्ट मोनिटर जुनियर र सिनियर, मोष्ट हार्डवर्किङ स्टुडेण्ट, प्रेरणात्मक विद्यार्थी, अनुशासित विद्यार्थी सिनियर र जुनियर, स्कुलमा नियमित उपस्थित हुने विद्यार्थी र सहयोगी विद्यार्थीलाई पनि मेडल तथा प्रमाण–पत्र प्रदान गरिएको छ ।
