सुनसरी / विश्व आदर्श स्कुलको आयोजनामा इटहरीमा प्रथम विश्वआदर्श जुनियर फुटबल प्रतियोगिता–२०७६ हुने भएको छ ।
आगामी आइतबारदेखि सो प्रतियोगिता हुन लागेको आयोजक विश्वआदर्श स्कुलले पत्रकार सम्मेलन गरी जनाएको छ । पाँच दिनसम्म सञ्चालन हुने सो प्रतियोगितामा कक्षा ५ सम्मका १२ वर्षसम्म उमेरभएका विद्यार्थीले सहभागिता जनाउन पाउनेछन् ।
विद्यार्थीहरूको शारीरिक, मानसिक, संवेगात्मक विकास, प्रतिस्पर्धात्मक भावनाको विकास गराउनुका साथै अनुशासित र मर्यादित जीवन शैलीलाई अपनाउने उदेश्यसहित प्रतियोगिता आयोजना गरिएको विश्वआदर्श एकेडेमीका अध्यक्ष लेखनाथ घिमिरेले बताए । स्थानीय स्तरमा खेलाडीहरूको उत्पादनलाई जोड दिने उद्देश्यसमेत रहेको उनको भनाइ छ ।
विद्यालयका प्रिन्सिपल गणेश दुलालका अनुसार प्रतियोगितामा इटहरी आसपासका १२ वटा विद्यालयको सहभागिता रहनेछ । प्रतियोगितमा विजेताले नगद १० हजार रुपैयाँ, उप विजेताले नगद ७ हजार रुपैयाँसहित ट्रफी र मेडल प्राप्त गर्ने पनि प्रिन्सिपल दुलालले बताए ।
