निर्माण सामग्री बोकेको गाडीमा आगलागी

विराटनगर । मोरङको विराटनगर महानगरपालिका–५ शान्तिचोकमा निर्माण सामग्री बोकेको गाडीमा  आगलागी भएको छ ।

एसुती निर्माण सेवाको अलकत्र बोकेको गाडीमा शनिबार साढे ४ बजे एक्कासि आगलागी भएको निर्माण कम्पनीले जनाएको छ । विराटनगरको एभरेष्ट कलेजदेखि केसलिया रोडसम्मको ठेक्का उक्त कम्पनीले लिएको छ । करिब तीन किलोमिटर सडक कालोपत्रे गर्ने तयारी उक्त कम्पनीले गरेको थियो ।

‘अलकत्रा लगाउनु अगाडि सडकमा प्राइम लगाउने काम भइरहेको थियो । त्यसको लागि अलकत्रा बोक्ने डिस्टीबेटर गाडीबाट अनलोड गर्ने तयारी भइरहेको थियो । त्यही क्रममा एक्कासि आगलागी भयो’ निर्माण कम्पनीका निर्देशक किशोर भट्टराईले भने, ‘हिट नगरी अलकत्रा झर्दैन । आगो लगाएर हिट गर्ने क्रममा आगलागी भएको हो ।’

गाडीसँगै एउटा सुपर स्प्लेन्डर मोटरसाइकल पनि जलेको प्रहरीले जनाएको छ । सो मोटरसाइकल निर्माण कम्पनीकै रहेको छ ।  आगलागीबाट करिब ५० लाख बढीको क्षति भएको निर्माण कम्पनीले बताएको छ ।