प्रिमियर लिग फुटबलमा लिभरपुलले विजयी सुरुवात गरेको छ । शनिबार राति भएको खेलमा नर्विच सिटीलाई ३–० गोल अन्तरले पराजित गर्दै लिभरपुलले सुखद सुरुवात गरेको हो ।
नर्विचविरुद्ध गोल गरेसँगै सलाहले प्रिमियर लिगमा कीर्तिमान बनाएका छन् । सलाहले लगातार पाँच सिजनको पहिलो खेलमा गोल गर्ने खेलाडीको कीर्तिमान बनाएका हुन् ।
जितसँगै लिभरपुलले सिजनको पहिलो खेलमा महत्वपूर्ण तीन अंक जोडेको छ ।
नर्विचले भने हारबाट सिजनको सुरुवात गरेको छ । नर्विच सिटी प्रिमियर लिगको गत सिजन उत्कृष्ट क्लबको रुपमा रहेको थियो ।
लिभरपुललाई जित दिलाउन डिएगो जोटा, रोबर्टो फिर्मिन्हो र मोहमद सलाहले एक एक गोल गरे ।
नर्विचको मैदानमा लिभरपुललाई जित दिलाउन खेलको २६ औं मिनेटमा जोटाले गोल गर्दै अग्रता दिलाएका थिए । ६५ औं मिनेटमा फिर्मिन्होले गोल गर्दा लिभरपुल २–० ले अघि रह्यो । ७४ औं मिनेटमा सलाहले गोल गर्दै लिभरपुललाई ३–० को जित दिलाए ।
