धनकुटा । हालै उदयपुरमा सम्पन्न कोशी प्रदेश स्तरिय बक्सिङ प्रतियोगितामा पदक विजेतालाई धनकुटामा शनिबार सम्मान गरिएको छ ।
जिल्ला बक्सिङ संघ धनकुटाले प्रशिक्षक तथा पदक विजेता खेलाडीहरुलाई सम्मान गरेको हो । सम्मानित हुनेमा स्वर्ण पदक विजेता शर्मिला आलेमगर, रजत पदक विजेता हाङसवा लिम्बू र कास्य पदक विजेता सञ्जय आले र नेगिन्द्र थापा मगरलाई सम्मान गरिएको हो ।
यस्तै बक्सिङका प्रशिक्षक किशोर लिम्बूलाई पनि सम्मान गरिएको छ । कोशी प्रदेश स्तरिय बक्सिङ प्रतियोगितामा धनकुटाको नाम राख्न सफल भएका खेलाडी तथा प्रशिक्षकलाई सम्मान गरिएको बक्सिङ संघ धनकुटाका अध्यक्ष विदुर खवासले बताए । उनले धनकुटालाई बक्सिङमय बनाउन लागि परिरहेको बताएका छन् ।
आगामी श्रावण दोस्रो सातादेखि धनकुटामा नियमित वक्सिङ्गको प्रशिक्षण कार्यक्रमको तयारी बक्सिङ संघले गरिरहेको जानकारी दिइएको छ ।
