धरान । कोशी प्रदेशमा गाँजाको कारोबार बढेर गएको छ । प्रदेशका विभिन्न नाकाहरूबाट भारत लैजाँदै गर्दा प्रहरीले दैनिकजसो गाँजा बरामद गर्दै आएको छ ।
कोशी प्रदेश प्रहरी कार्यालय विराटनगरका अनुसार आर्थिक वर्ष २०८०÷०८१ मा १० हजार ४ सय २० केजी गाँजा विभिन्न जिल्लाबाट प्रहरीले बरामद गरेको छ । यही आ.व.को चैत १५ सम्ममा ९ हजार ९ सय ७० केजी गाँजा बरामद भएको प्रदेश प्रहरी कार्यालय विराटनगरले जनाएको छ । गत आ.व.को हाराहारीमा अहिले नै गाँजा बरामद भएको प्रहरी प्रवक्ता एसएसपी भीम दाहालले जानकारी दिए ।
अवैध कारोबार र लागूऔषध नियन्त्रणका लागि प्रहरीले अभियान नै चलाएर काम गरेकाले ठूलो परिमाणमा गाँजा बरामद भएको एसएसपी दाहालले जानकारी दिए । उनका अनुसार लागूऔषध कारोबारमा आ.व. २०८०÷०८१ मा विभिन्न जिल्लामा एक हजार ९३ वटा मुद्दा दर्ता भएका थिए । ९४ महिलासहित एक हजार ५ सय ८६ जनालाई प्रहरीले पक्राउ गरेको छ ।
यस्तै गत साउनदेखि फागुन १५ गतेसम्म ८ सय ५० वटा मुद्दा दर्ता भएका छन् भने ६७ महिलासहित एक हजार २ सय ८४ जना विभिन्न जिल्लाबाट पक्राउ गरेको एसएसपी दाहालले बताए ।
सुनसरी गाँजा कारोबारको केन्द्र बन्दै
प्रहरीको तथ्याङ्कअनुसार सबैभन्दा बढी गाँजा कारोबार सुनसरीमा भएको देखिन्छ । गाँजा उत्पादन धनकुटा, भोजपुरलगायतका जिल्लामा हुने गरेको छ भने ती जिल्लाबाट भारत लाने बाटो भने सुनसरी प्रयोग हुँदै आएको पाइएको छ । सुनसरीको धरान, वराहक्षेत्र र कोशी गाउँपालिका हुँदै भारतको जोगवनी, वीरपुर र सुनसरीको दक्षिणीक्षेत्रको सिमाना हँुदै भारत लैजाने गरिन्छ । विशेषगरेर धरान, वराहक्षेत्र र भण्टाबारी इलाकाले भारत लैजाँदै गरेको गाँजा बरामद गर्दै आएको छ ।
प्रहरीको तथ्याङ्कअनुसार सुनसरी प्रहरीले २०८० साउनदेखि गत फागुन १५ गतेसम्ममा ७ हजार ३ सय ४१ केजी गाँजा बरामद गरेको छ । यही चैत ८ गते झापाको बुद्धशान्ति गाउँपालिका–४ बर्नेस्थित मेची राजमार्गबाट १ हजार ६ सय ४१ किलो गाँजासहित दुईवटा ट्रक नियन्त्रणमा लिएको थियो । झापामा यसअघि यति ठूलो परिमाणमा गाँजा बरामद भएको थिएन । सुनसरी र सप्तरीको नाकाबाट करोवार हुँदै आएकोमा तस्करको समूहले रुट परिवर्तन गरी झापाको नाका प्रयोग गर्न खोजेका थिए । तर सशस्त्र प्रहरीको सहयोगमा प्र.१ ख ५००१ र प्र.१–०२–००२ ख ०५८४ नम्बरको मिनी ट्रकसहित यो परिणाममा गाँजा बरामद गरेको थियो ।
यस्तै खोटाङबाट १४ सय २५ केजी, मोरङबाट ११ सय २१ केजी, इलामबाट ८ सय १६ केजी, भोजपुरबाट १६ केजी र खोटाङबाट २ केजी गाँजा बरामद भएको प्रदेश प्रहरीको तथ्याङ्कमा उल्लेख छ ।
प्रहरीले गाँजा उत्पादन हुने क्षेत्रमा बोट नष्ट गरेको बताए पनि सुकेको गाँजा तस्करीमा भने कमी आएको छैन । सिजनका बेला प्रहरीले धनकुटाका विभिन्न स्थानमा झण्डै दुई लाख गाँजाको बोट नष्ट गरेको बताएको थियो । जिल्ला प्रहरी कार्यालय धनकुटाको तथ्याङ्कअनुसार ५८ रोपनी जग्गामा लगाइएको १ लाख ८७ हजार गाँजाको बोट नष्ट गरेको जानकारी गराएको थियो । धनकुटाको महालक्ष्मी नगरपालिका, सहिदभूमि गाउँपालिका र पाख्रीबास नगरपालिकाका विभिन्न क्षेत्रमा अवैधरूपमा लगाइएको गाँजाखेती नष्ट गरेको हो । गाँजाको बोट ठूलो परिमाणमा नष्ट गरेको प्रहरीले प्रचार गरे पनि गाँजा बरामदका घटनामा कमी भने आएको छैन ।
कोशी प्रदेशको मुख्य चुनौती लागूऔषध
कोशी प्रदेशको मुख्य चुनौतीका रूपमा प्रहरीले लागूऔषधलाई नै लिएको छ । प्रहरीको लागूऔषध नियन्त्रणका लागि छुट्टै ब्युरो छ । त्यसले गाँजा तथा अन्य लागूऔषध नियन्त्रणका लागि काम गर्दै आएको छ । कोशी प्रदेश प्रहरी प्रमुख डिआइजी राजन अधिकारीका अनुसार गाँजा उत्पादनदेखि लिएर बिक्री वितरणसम्म नियन्त्रणका लागि प्रहरीले टिम बनाएर काम गर्दै आएकाले ठूलो परिमाणमा गाँजा बरामद हुँदै आएको हो ।
‘लागूऔषध ओसार–पसार र गाँजा उत्पादन नियन्त्रणमा प्रहरीले निगरानी बढाएको छ । भारतीय नाकाहरू निगरानीदेखि गाँजा ओसार–पसार हुने नेपालकै नाकाहरूमा प्रहरीले उच्च निगरानी गर्दै आएको छ’ डिआइजी अधिकारीले भने, ‘मुख्य चुनौतीको पहिचान गरी उत्पादन, तस्करीको प्रवृत्तिको पहिचान गरी निगरानी बढाएका छौँ ।’
भारतबाट आउने ब्राउनसुगर पनि प्रहरीले ठूलो मात्रामा बरामद गरेको उनले बताए । नेपालबाट गाँजा भारत लैजाने र उक्त गाँजा बिक्री गरी ब्राउनसुगर खरिद गर्ने गरेको पक्राउ गरेकाहरूबाट खुलेको छ ।
