इटहरी । इटहरीमा एक महिलाले खरिद गरेको निजी जग्गामा नाला र पैनी देखाएर वडा कार्यालयले सर्जमिन गरी न्यायिक समितिलाई पठाएपछि समस्या उब्जिएको छ ।
इटहरी उपमहानगर–४ जागृति टोल निवासी लक्ष्मी अधिकारीले खरिद गरेको निजी जग्गामा सम्बन्धित वडा कार्यालयले नाला र पैनी देखाई झुटो सर्जमिन मुचुल्का बनाएर न्यायिक समितिलाई पठाएपछि अहिले विवाद उब्जिएको हो । नक्सामै नभएको नाला र पैनी कागजमा देखाएर सर्जमिन गरेपछि इटहरीकी लक्ष्मी अधिकारीले आफ्नो निजी जग्गा संरक्षणका लागि पत्रकार र न्यायिक समितिसँग हारगुहार गरेकी छन् । इटहरी उपमहानगर–४ जागृति टोलकी लक्ष्मी अधिकारी अहिले आफ्नो जग्गा जोगाउन अदालत जाने तयारीमा छिन् । उपमहानगरको न्यायिक समितिबाट न्याय नपाएपछि उनी अदालत जाने तयारी गरेको बताउँछिन् ।
नम्बरी जग्गामा जबरजस्ती पैनी र नाला देखाएर वडा कार्यालयबाट सर्जमिन गरेपछि शुक्रबार उपमहानगरको न्यायिक समितिले तिनै महिलाको विपक्षमा फैसला गरेको थियो । लक्ष्मीले २०६५ सालमा स्थानीय छिमेकीबाट इटहरी–४ जागृति टोलमा साढे १३ धुर जग्गा किनेको बताइन् ।
पटक–पटक अमिनले नापजाँच गर्दा र नापी शाखाबाट जारी भएको नक्सामा पनि नाला र पैनी नभेटिएको अवस्थामा वडा कार्यालयले झुटो सर्जमिन बनाएर आफूलाई अन्याय गरेको उनले आरोप लगाइन् । उनले न्याय पाउने आशामा विगत ५ महिनादेखि उपमहानगरको न्यायिक समिति धाएको तर उपमेयर सङ्गीताकुमारी चौधरीको एकलौटी निर्णयले अन्याय भएको बताउँदै अदालत जाने बताइन् ।
अधिकारीले खरिद गरेको जग्गाको विषयलाई लिएर स्थानीय शेषराज खतिवडासहित २४ जनाले ५ महिनाअघि न्यायिक समितिमा उजुरी गरेका थिए । अधिकारीले जग्गा खरिदसँगै भौतिक संरचना निर्माण गर्दा पैनी थुनेको दाबीसहित भोगचलनमा बाधा पुग्ने गरी खतिवडासहित २४ जनाले ०८१ मङ्सिर १७ गते न्यायिक समितिमा उजुरी दिएका थिए । उजुरीपश्चात् समितिले सम्बन्धित वडा कार्यालयलाई सो जग्गाको विषयमा सर्जमिन मुचुल्का तयार पारी न्यायिक समितिमा बुझाउन अनुरोध गरेबमोजिम ४ नं. वडा कार्यालयले आफूलाई थाहै नदिई सर्जमिन मुचुल्का बनाएर पठाएको पीडित महिलाको भनाइ छ ।
कागजमा उल्लेख भएबमोजिम सो जग्गामा कुनै नाला तथा पैनी पनि नरहेको उनले दाबी गरिन् । उजुरी गर्ने खतिवडा आफ्नो छिमेकी पनि नरहेको उनले बताइन् । आसपासका छिमेकीहरूलाई यस जग्गाले अहिलेसम्म कुनै असर नै नगरेको बताउँदै बर्खाको बेला आउने भेल सिधै आफ्नो जग्गाबाट कटाएर ड्रेनमा हाल्ने योजनाअनुसार शेषराजले षड्यन्त्र रचेको उनले आरोप लगाइन् ।
यता सर्जमिन मुचुल्का बनाउने इटहरी उपमहानगर वडा नं. ४ का वडाध्यक्ष भक्त लामाले जग्गाको विषयमा लामो समयदेखि विवाद भएको र आफूले नसकेपछि न्यायिक समितिमा पठाएको उल्लेख गरे । उनले स्थलगत अवलोकन गरेर सर्जमिन गरिएको तर अधिकारीले खरिद गरेको जग्गा भने नम्बरी नै रहेको बताए । सो क्षेत्र बर्खाको बेला डुबान हुने भएकोले त्यहाँका स्थानीयको भनाइलाई राखेर सर्जमिन गराई न्यायिक समितिमा पठाइएको हो । बर्खाको बेला स्थानीय शेरा खोलामा आएको बाढी सोझै यही बस्ती हुँदै टेङ्ग्रा खोलामा मिसिने गरेको छ ।
यता न्यायिक समितिकी संयोजक तथा उपमेयर सङ्गीताकुमारी चौधरीसँग बुझ्दा उनले वडा कार्यालयबाट प्राप्त सर्जमिन र नेपालको कानूनअनुसार अधिकारीले खरिद गरेको जग्गा परापूर्वकालदेखि नै पानी जम्ने, खाली जमिन रहेको पाइएकोले पैनीको जग्गा छुटाएर भोगचलन गर्न पाउने गरी निर्णय गरेको बताइन् । उनले फैसला चित्त नबुझे अदालत जान सुझावसमेत दिइसकेको उनले बताइन् ।
यता उपमेयरको फैसलालाई लिएर न्यायिक समितिभित्रै दुईमत भएको छ । न्यायिक समितिका सदस्य एवम् उपमहानगरका प्रवक्ता दिवस पोख्रेलले फैसलाविरुद्ध नोट अफ डिसेन्ट लेखेको बताए । उनले पटक–पटक अमिन लगेर नापजाँच गर्दा कुनै नाला तथा पैनी नभेटिएको, जग्गाको नक्सामा समेत कुनै नालापैनी नदेखिएको हुँदा उपमेयर चौधरीको फैसलाविरुद्ध नोट अफ डिसेन्ट जनाएको उनले बताए ।
