भद्रपुर । झापाको भद्रपुरस्थित मेची रङ्गशालामा अनुमानित १ करोड ५० लाख रुपैयाँको लागतमा भद्रपुर झापा गोल्ड कप अन्तर्राष्ट्रिय आमन्त्रण नकआउट फुटबल प्रतियोगिता सञ्चालन हुने भएको छ । मेची रङ्गशालामा १८ वर्षपछि यही फागुन अन्तिम साता हुने फुटबल खेलका लागि उक्त रकम प्रारम्भिक खर्च अनुमान गरिएको हो ।
अखिल नेपाल फुटबल सङ्घ (एन्फा) सँगको छलफलपछि मिति तय हुने भद्रपुरमा बिहीबार आयोजित पत्रकार सम्मेलनमा आयोजकले जानकारी दिएको हो ।
आयोजक समितिका अध्यक्ष दीपेश ढकालका अनुसार प्रतियोगिताका विजेताले नगद १३ लाख, ट्रफी, मेडल र प्रमाण–पत्र पाउनेछ भने उपविजेता टिमले नगद ७ लाख, ट्रफी, मेडल र प्रमाण–पत्र प्राप्त गर्नेछ ।
प्रतियोगिताका लागि मेची रङ्गशालाको स्तरोन्नति सुरु भइसकेको महासचिव जीवनकुमार श्रेष्ठले जानकारी दिए । अत्यन्त जीर्ण अवस्थामा रहेको झापाकै पुरानो र स्थायी सो रङ्गशालामा झार रोप्ने र माटोको लेभल मिलाउने काम भइरहेको छ ।
झापा फुटबलको उर्वर भूमि हो भने सदरमुकाम भद्रपुर राष्ट्रिय–अन्तर्राष्ट्रिय खेलाडी उत्पादन गर्ने थलो हो । जिल्लाको सबैभन्दा पुरानो र व्यवस्थित मेची रङ्गशाला देशका चर्चित र सफल खेलाडीहरूको प्रारम्भिक खेलमैदान हो ।
१८ वर्षअघि आयोजना भएको ‘त्रिभुवन मेमोरियल गोल्डकप’ पछि फुटबलका ठूला र प्रतिष्ठित खेलहरू आयोजना हुन नसक्दा मेची रङ्गशालाको खेलमैदान र थप पूर्वाधारलाई व्यवस्थित गर्न सकिएको थिएन ।
‘यो प्रतियोगिता झापाको प्रतिष्ठित ‘झापा गोल्डकप’ कै निरन्तरताको एउटा कडी भएको पनि जानकारी गराउन चाहन्छौँ’ –अध्यक्ष ढकालले भने । बिर्तामोडस्थित डोमालाल राजवंशी रङ्गशालामा आयोजना हुँदै आएको ‘झापा गोल्डकप’ लाई यस वर्ष रोकेर मेची रङ्गशालामा ‘भद्रपुर झापा गोल्डकप’ आयोजना गर्न लागिएको हो ।
प्रतियोगितामा नेपालका ‘ए’ डिभिजन क्लबहरूसहित विदेशी टोलीको सहभागिता रहने वरिष्ठ उपाध्यक्ष तथा टिम व्यवस्थापन तथा छनोट उपसमिति संयोजक आदित्य पराजुलीले जानकारी दिए । प्रतियोगितामा १० टिमको सहभागिता रहनेछ ।
खेल सञ्चालनका लागि भद्रपुर नगरपालिकाले चालु आर्थिक वर्षमा गोल्डकपका लागि ३० लाख रुपैयाँ बजेट छुट्याइएको नगरप्रमुख गणेश पोखरेलले जानकारी दिए ।
कुल १ करोड ५० लाख रुपैयाँ खर्च अनुमान गरिएको प्रतियोगिताका लागि बाँकी रकम व्यापारिक प्रतिष्ठानबाट स्पोन्सरका रूपमा सङ्कलन गरिने सह–कोषाध्यक्ष अजय साहेवालाले जानकारी दिए ।
प्रतियोगिताका उत्कृष्ट गोलकिपर, उत्कृष्ट डिफेन्डर, उत्कृष्ट मिडफिल्डर, उत्कृष्ट फरवार्ड र उत्कृष्ट प्रशिक्षकलाई २५ हजार तथा प्रत्येक खेलको म्यान अफ द म्याच खेलाडीलाई नगद १० हजार नगद पुरस्कार प्रदान गरिनेछ ।
यसैबीच प्रतियोगिताका सबै खेलमा विशेष परिस्थितिका नागरिकलाई प्रवेश निःशुल्क गरिने भएको अध्यक्ष ढकालले बताए । ढकालका अनुसार भद्रपुर नगरभित्रका सरकारी विद्यालयका विद्यार्थीलाई खेल हेर्न टिकट लाग्ने छैन । त्यस्तै नगरभित्रका ज्येष्ठ नागरिक तथा फरक क्षमता भएका नागरिकलाई पनि प्रवेश निःशुल्क गरिएको ढकालले जानकारी दिए ।
