काठमाडौं । ‘छोरीको बिहे गरिस्, हैन । तेरा दुई छोरा छन्, तिनीहरु मध्ये एउटालाई मार्दिन्छु, छोरो ठूलो कि दुई करोड ?’
काठमाडौंको नयाँ बानेश्वरमा शरद गौचनमाथि गोली प्रहार भएपछि भक्तपुरका एक इट्टा ब्यवसायीलाई टेलिफोनबाट यस्तो धम्की आयो । नेपाली नम्बरबाटै आएको यस्तो धम्कीपछि उनी केन्द्रीय अनुसन्धान ब्यूरोमा पुगे, प्रहरी अनुसन्धानको क्रममा उक्त फोन नेपाली नम्बर डिस्प्ले हुनेगरी भारतबाट आएको देखियो ।
रुपन्देहीको देवदहमा गत साता मनोज पुन ‘इन्काउन्टर’मा मारिएपछि उनको डायरी हेर्दा अनुसन्धानमा संलग्न प्रहरी अधिकृत चकित भए । भक्तपुरको ती इट्टा व्यापारीको नाम मनोज पुनको डायरीमा लेखिएको थियो । जसमा मनोजले कोड भाषामा लेखेका थिए, ‘भक्तपुरको इट्टावाला, फोन नम्बर, दुई करोड मध्ये लिने रकमको डिल हुन बाँकी ।’
गुण्डा नाईके मनोज पुनले भक्तपुर, पोखरा, बुटवल, भैरहवा, नवलपरासी र कपिलवस्तुका ब्यवसायीलाई त्यसैगरी फोन गरेर करोडौंको माग गर्थे । रकम नदिए गोलीले उडाउने धम्की दिन्थे ।
रुपन्देहीको खैरेनीस्थित सुकुम्बासी बस्तीबाट उदाएर गुण्डा नाइकेको रुपमा चिनिएका मनोज २०७३ पुस पहिलो साता रुपन्देहीका दुर्गा तिवारीमाथि गोली प्रहार गर्नुभन्दा पहिले नै भारतमा बस्न थालेका थिए ।
भारतमा बसेर नेपालमा आतंक सिर्जना गर्दै करोडौं उठाउने पुनलाई मुम्बईका गुण्डा नाईके बिटु सिंह भनिने ‘जोगिन्दर’ ले संरक्षण गरेको प्रहरी अनुसन्धानबाट खुलेको छ ।
त्यसरी करोडौं उठाउने मनोज भारतमा सामान्य तरिकाले बसेका थिए । रुपन्देहीमा उनको परिवार अभावमा बाँचेको थियो । उनकी श्रीमती ‘मनी ट्रान्सफर’ मा सामान्य कर्मचारी छिन् ।
त्यसो भए, मनोजले धम्क्याएर उठाएको करोडौं के गर्थे ?
विगत एक बर्षदेखि मनोज पुनबारे अनुसन्धान गरिरहेका एक प्रहरी अधिकृतका अनुसार नेपालबाट उठाएको करोडौं रुपैयाँ जोगिन्दरले लिन्थे । अनि मनोजलाई खर्च मात्रै दिन्थे ।
‘मनोज जोगिन्दरको सहयोग बिना भारतमा बस्न सम्भव थिएन’ अनुसन्धानमा संलग्न ती प्रहरी अधिकृत भन्छन्, ‘भारतमा सेल्टर दिएर जोगिन्दरले मनोजलाई प्रयोग गरे, अनि यताबाट उठाएको करोडौं आफैंले चलाए ।’
