काठमाडौं उपत्यकालाई स्वच्छ पारेरै छोड्ने जनसंख्या तथा वातावरण मन्त्री लालबाबु पण्डितले आफ्नो पहिलो निर्णय गरेका छन् । जसअुनसार सोल्टी सिटी अपार्मेन्ट रविभवन, द्वारिकाज होटल गौशाला, सिटी होटल रविभवन, काठमाडौं गेष्ट हाउस ठमेल, अरनिको आवुखैरेनी सिमेन्ट इण्डष्ट्रिज तनहुँ, कमला रेलिङ मिल्स मोरङ, काठमाडौं दुध वितरण आयोजना बालाजु, नेपाल नेशनल हस्पिटल कलङ्की, अन्तर्राष्ट्रिय मैत्री बाल अस्पताल महाराजगञ्ज, काठमाडौं मोडेल अस्पताल भृकुटीमण्डप, काठमाडौं अस्पताल त्रिपुरेश्वरलाई मन्त्री पण्डितले कानुनी कारबाही गरेका छन् ।
यस्तै विभिन्न निर्माण कम्पनीले खनेका काठमाडौंका सडक तत्काल मर्मत गरी धुलो नियन्त्रण गर्न मन्त्रालयले सम्बन्धित विभाग र आयोजना कार्यालयहरुलाई पत्राचार गरेको छ ।
तत्कालीन सम्झौताअनुसार मेलम्ची खानेपानी आयोजनालाई पनि मन्त्रालयले दिनको ४ पटक पानी छम्किन निर्देशन दिइसकेको छ । “अब उपत्यकामा हरेक पल मास्क प्रयोग गर्नुपर्ने छैन,” मन्त्री पण्डितले विश्वास व्यक्त गरे, “काठमाडौं उपत्यकाको वातावरणमा तत्कालै कुनै जादु गर्ने होइन सामान्य अवस्थामा ल्याउन हरसम्भव प्रयास गर्नेछु ।”
