भद्रपुर । झापामा एक व्यक्तिको अपहरणपछि हत्या भएको छ । हत्यामा संलग्न भएको आशङ्कामा प्रहरीले एकजनालाइ नियन्त्रणमा लिएको छ । कपडा व्यवसाय गर्दै आएका कमल गाउँपालिका–६ मङ्गलबारेका ३८ वर्षीय खेमराज पौडेलको अपहरणपछि हत्या भएको प्रहरी कार्यालय झापाका डिएसपी तथा प्रवक्ता जितेन्द्रकुमार बस्नेतले जानकारी दिए ।
हत्या गरी फालिएको पौडेलको शव गौरीगञ्ज गाउँपालिका–६ बाह्रदशी स्थित विनोद यादवको खेत नजिकै रहेको नालामा मङ्गलबार बिहान भेटिएको डिएसपी बस्नेतले बताए । पौडेलको घाँटी र टाउकोमा छुरा प्रहार गरिएको छ भने घटनास्थलमा मे ७ प १९०४ नम्बरको मोटरसाइकल, मोबाइल फोन र व्याग फेला परेको प्रहरीले जनाएको छ । हत्यामा सम्लग्न भएको आशङ्कामा गौरीगञ्जका सद्धाम हुसेनलाई पक्राउ गरेको प्रहरीले जनाएको छ ।
घटना विवरण अनुसार सोमबार बेलुका मोटरसाइकलमा सवार पौडेल र उनकी श्रीमती पसलको उधारो रकम उठाउन गौरीगञ्ज बजार पुगेका थिए । करिब ६ बजे श्रीमतीलाई खाजा पसलमा छाडेर मोटरसाइकलमा सद्धाम हुसेनलाई सँगै लिएर उधारो रकम उठाउन खेमराजले लिएर गएका थिए । ९० हजार रुपैयाँ उठाउन गौरीजञ्ज गएको पौडेलकी श्रीमतीले उद्धृत गर्दै प्रहरीलाई जानकारी दिएको जनाइएको छ । सद्धामसँग गएका पौडेल राति अबेरसम्म नफर्किएपछि अपहरण परेको आशङ्कामा श्रीमतीले इलाका प्रहरी कार्यालय गौरीगञ्जमा जानकारी गराएकी थिइन् । अपहरणमा परेको सूचना पाएलगतै प्रहरीले रातभर खोजतलास गरेपछि मङ्गलबार विहान शव फेला पारेको थियो ।
