विराटनगर / नेपाली काँग्रेसका केन्द्रीय सदस्य डा. शेखर कोइरालाले १४ औं महाधिवेशनलाई समयमा हुन नदिन र समय थप गरेर अरु अढाई वर्ष लम्ब्याउन सभापति शेरबहादुर देउवा लागेको खुलासा गरेका छन् ।
विराटनगरस्थित कोइराला निवासमा सोमबार नेपाल प्रेस युनियन मोरङले आयोजना गरेको पत्रकार सम्मेलनमा कोइरालाले भने, ‘हाम्रो कार्यकाल अब एक वर्षमात्र बाँकी छ तर सभापति देउवा भने दुई वर्ष थप्ने दाउमा हुनुहुन्छ ।’ पार्टी संगठनमा भएको जथाभावीको विषय लिएर आफूँ कार्यकर्ता माझ जाने र गइरहने बताउँदै कोइरालाले भने,–‘काँग्रेस कमजोर भएको छ । संगठन शुन्य बराबर छ । हारको जिम्मा कसले लिने भन्दा मलाई अनुशासन र कार्वाहीको कुरा गरे भने मलाई केही भन्नु छैन् ।’ उनले काँग्रेस पार्टी कोइरालाहरुको मात्र नभएको बरु सबैको योगदान र रगत बगाइबाट पार्टी बनेको बताए ।
देउवाले ‘पार्टी कोइरालाहरुको बपौती नभएको र शेखर कोइराला को हो ?’ भन्दै वीरगञ्जमा गरेको टिप्पणीबारे डा शेखरले, ‘‘म को हुँ भन्ने मलाई हेक्का छ, म मेरो राजनीतिक संस्कार छाड्न सक्तिन् बरु कोइराला परिवारको संस्कारलाई अझ बरु करार राख्छु ।’ उनले पार्टी सभापति देउवाको राजनीतिक कस्तो संस्कार रहेछ भन्ने देखिएको पनि टिप्पणी गरे ।
‘उहाँले मेरो र परिवारबारे जे बोल्नु भएको छ, त्यो उहाँकै राजनीतिक संस्कार होला,’ कोइरालाले भने ‘वीपी कोइरालाले लेखेको विधान टेकेर यहाँसम्म आएको काँग्रेसले गिरिजाप्रसाद कोइरालाले संसद पुर्नस्थापना गराउँदा विश्वले वाहवाही गर्दासमेत पार्टीको विधान संशोधन गरिदा राजनीतिक प्रस्तावनामा यसलाई नजरअन्दाज गरिएको छ ।’
योगदान विश्वले सम्झिरहेको छ तर यहाँ भने इतिहास मेटाउन खोजिएको उनको भनाई थियो । वहुमतले विधान पारित हुनु लोकतान्त्रिक विधि भए पनि आफूँ काठमाडौमा रहेको भए ‘नोट आफ डिसेन्ट’ लेख्ने बताए । तलबाट निर्वाचित भएर आउने प्रावधान नराखेकोमा आफूलाई मान्य नहुने बताउँदै कोइरालाले संरक्षित कोटामा पनि एक पटक मात्र हुनुपर्ने र अर्को पटकदेखि प्रतिस्पर्धाको आधारमा नै आउनु पर्ने व्यवस्थाको पक्षमा आफू रहेको बताए । महासमितिले दिएको ‘म्यान्डेड’ भन्दा अलग प्रस्ताव स्वीकार्य नहुने कोइरालाको जोड छ ।
